TENY VELONA
“VELONA SY MAHERY NY TENIN’ANDRIAMANITRA !" Heb 4:12
Dia lany teny amin’ny antenimiera frantsay izany fa hahazo misora-panambadiana koa manomboka izao ny olona mitovy fananahana.
Samy nanao izay ho afany ny mpanohana sy ny mpanohatra na teny an-dalambe na tany an-dapa fivoriana. Ny tosika politika koa moa etsy an-daniny, na dia tsy misy ifandraisana amin'ny fironana politika havia na havanana aza izany, satria samy ahitana azy ireo daholo.
Dia lasa ny saina amin’ny maha-kristiana izay nirahin’I Jesosy ho vavolombelony any Jodia sy Samaria ary hatrany amin’ny faran’ny tany rehetra.Tokony hijoro ho isan’ny mpanohitra koa ve isika, sa hitondra am-bavaka, sa inona azo atao ?
Satria raha ny voalaza ao amin’ny Genesisy tokoa dia “Lahy sy vavy no namoronany azy”…”Ary ralehilahy dia handao ny tokantranony ka hikambana amin’ny vadiny”, ary nomeny ny tsodrano hoe “Miteraha, mamenoa ny tany !”… tsy atoro antsika intsony izany.
Tranga roa no hotantaraiko anao atao tsetsatsetsa tsy aritra :
Tao amin’ny toeram-piasana iray, lehilahy iray efa azo lazaina hoe lehibe nahazo taona, tena mazoto sy mahafatrapo amin’ny asany, tia sy miara-mipetraka amina lehilahy ary tsy miafina amin’izany fironana arahiny izany . Tsy misy ohatr’izany ny hatezerany, manopa mihintsy aza mahita amin’ny fahitalavitra ireo mpanohitra ny “fanambadian’ny olona mitovy fananahana”. Izay koa hoy izy mandoa hetra toy ny rehetra ka manana ny zonay, f’angaha rehefa mandoa hetra misy manontany hoe “gay” ianao ? Dia inona azonao havaly azy amin’izany ? Asa raha ianao no teo amin’ny toerako, fa izaho aloha niodina mody tsy nihaino fotsiny sady namorona zavatra hatao nitsoahana moramora…
Resaka iray sendra reko teny am-pamiliana fiara taty an-dafy koa, tao amin’ny fampielezam-peo protestanta iray : misy mpitondra fivavahana sahy mijoro sy manazava amin’ny alalan’ny baiboly fa izy dia manaiky izany karazana fanambadiana izany, ary efa nanamasina mihintsy aza tao amin’ny fiangonana misy azy. Dia mahatalanjona !
Sanatria tsy hanao toy ny vavak’ilay Fariseo aho akory ka hanamarin-tena, fa isaorako ny Tompo aloha hatreto fa mbola tsy misy nirona amin’izany ny fianakaviana sy ankohonako akaiky (izay miafina no tsy haiko), ary izany koa no mbola ivavahako mandrakariva !
Mandeha ny andro sy ny volana, mivadika ho taona ! Hoy ny Salamo nataon'i Mosesy : "Mampianara anay hanisa ny andronay, hahazoanay fo hendry"(Salamo 90:12). Haintsika ve ny mampiasa ny andro omen'ny Tompo antsika hanaovana izay mety sy tsara tokony hatao, sa mbola laniantsika amin'ny fitsikerana ary ny fanaratsiana ny hafa foana ?
Lasa ny saina fa indraindray ny olona izany lazaina ho olon'Andriamanitra sy voaantso hanao ny asany no manao izay hampihemotra ny mpino, amin'ny toetra asehony amin'ny fifandraisana amin'ny manodidina azy. Jesosy raha niseho tamin'ny mpianany taorian'ny nitsanganany tamin'ny maty dia nanonona ny Fiadanana, ary izany Fiadanan'Andriamanitra izany, araka ny Filipiana 4:7 dia "Mihoatra noho ny fahalalana rehetra".
Koa mandiniha tena, fa sao mihevitra ianao fa mahay, na manankarena sy manam-pahalalana noho ny hafa. Ny Fiadanana avy amin'i Jesosy ," ilay tsy miova omaly sy anio ary mandrakizay", izay ihany no tokony ho hita taratra aminao sy zarainao amin'ny hafa. Sao sanatria ny ondry efa ao am-bala indray no avoakanao any ivelany, etsy andaniny izay mbola tsy tafiditra tsy manam-paniriana hanantona akory noho ny afitsokao ihany !
"Fiadanana no avelako ho anareo, ny fiadanako no omeko anareo; tsy tahaka ny fanomen'izao tontolo izao no fanomeko anareo. Aza malahelo na matahotra ny fonareo."Jaona 14:27. Izany tenin'i Jesosy izany no raiso ary apariaho amin'ny ondry asain'ny Tompo tandremanao.
Ho an'Andriamanitra irery ny voninahitra !
« 1 Aza manangan-tsaho foana. Aza mifandray tànana amin'ny ratsy fanahy ho vavolombelona mampidi-doza.2 Aza manaraka ny maro hanao ratsy; ary aza mamaly ny amin'ny adin'olona hivily hanaraka ny maro hamadika ny rariny.3 Aza mandravaka ny tenin'ny malahelo eo amin'ny fandaharan-teniny hianao”
---------------------------
Rehefa avy nanome ny didy folo ho an’ny zanak’Israely Andriamanitra , tamin’ny alalan’i Mosesy izay nandray izany tany an-tendrombohitra, dia mbola nanome lalana maro nasainy hotandremana koa. Na dia misy sasany amin’ireo lalana ireo aza no tsy azo raisina ara-bakiteny amin’ny andro ankehitriny (vakio toko 21 sy 22), ny ankamaroany kosa dia mbola azontsika hakana lesona, indrindra manoloana izao fotoana sarotra andalovan’ny firenena Malagasy izao.
Tahaka izany ireto andalany telo horaisintsika androany ireto.
Toy izao avy ary izany :
1 – Tsy manangan-tsaho foana
Fampielezana lainga sy famitahana ny tsaho. Mitera-doza eo amin’ny fiaraha-monina izany satria asa famitahana olona. Toy izany koa ny vavolombelona mandainga ka atao hoe : ratsy fanahy. Loza no vokatry ny lainga. Olon-dratsy, masiaka ratsy fanahy ny mpandainga. Mikendry izay hahatonga loza amin’ny namana sy ny mpiray tanindrazana no ataony.
Te ho maro ny ratsy fanahy, koa tsy eken’ny Tompo ny mifandray tànana, na miara-miasa sy mandray vola amin’izy ireny hanao ny asa ratsiny. Mitaiza antsika kristiana ho marina ny Tompo.
2 – Tsy mivadika ny rariny
Tsy mitombina velively ny filazana fa “feon’Andriamanitra ny feom-bahoaka”. Tandremo hanaraka ny maro an’isa hamadika ny fahamarinana. Matetika matanjaka ny feon’ny maro an’isa nefa tsy rariny, tsy araka ny sitrapon’ny Tompo.
Misy fitsipika mazava eto : ny fahamarinana no laharam-pahamehana fa tsy ny maha-mpinamana. Loharano ipoiran’ity toetra ity ny fitiavam-bola, ny fiandaniana amin’ny heverina fa matanjaka eo amin’ny fiaraha-monina.
3 - Tsy miandany foana amin’ny malahelo
Toy izany koa no ampitandremana ny vahoakan’Andriamanitra tsy handravaka ny tenin’ny malahelo. Ny hevitry ny mpanaraka ny firehana miandany amin’ny madinika, dia ny fametrahana ny lehibe ho mpandainga sy mpanambaka matetika.
Ambaran’ny Tompo eto fa tsy izay malahelo akory dia marina ary izay mahantra dia vokatry ny fampahorian’ny lehibeny hatrany.
Nalaina tamin’ny boky Mofon’aina, 09 desambra 2008.
Fanamarihana :
Hitantsika fa efa voasoratra talohan’ny nisian’ny savorovoro eto amin’ny firenena ity fampianarana ity, ary tsy natao hiandaniana na hitsikerana ny mpomba an’izatsy na izaroa akory sanatria, fa natao ho fampieritreretana ho antsika Malagasy rehetra, indrindra ny Kristiana.
Tena velona sy mahery tokoa ny Tenin’Andriamanitra ! ho Azy irery ny voninahitra !
Faly miarahaba antsika Tratry ny Paska 2009
Jesosy ilay nandresy ny fahafatesana ka nitsangana tamin'ny maty anie mba ho velona isan'andro ao am-pontsika tsirairay !
Efa herinandro vitsivitsy izay no nikasa hiverina hanoratra eto indray aho, nefa efa ela loatra no tsy nanoratra intsony dia hadino ny tenimiafina. Rehefa natao indray ny fanovana dia tsy nety tafiditra raha tsy izao.
Koa dia miomankomana hampiditra lahatsoratra vaovao tsy ho ela indray !
Hovakiantsika ny II Samoela 12 :13-31.
Ireto avy ny fahamarinana sy toetra tsara alain-tahaka avy amin'ny fiainan'i Davida mpanjaka araka ity teny anjarantsika anio ity :
-Tsy nanamarin-tena Davida rehefa nambara taminy ny fahotany :
Hoy davida : Efa nanota tamin’i Jehovah aho ! Mpanjaka nanana fahefana izy, azony natao ny namono an’i Natana, na niteny hoe iza koa ianao no hananatra ahy ? Tsy izany anefa no nataony fa niaiky izy : "Efa nanota teo anatrehan’i Jehovah aho, ary nivavaka nandritra ny 7 andro izy .
Hitantsika ao amin’ny Salamo 51 fa tena nibebaka sy nifona tamin’Atra izy. Io no Salamo nosoratany tamin’izy nanarin’i Natana. Tsaroan’i Davida nangidy taminy ny fiainany rehefa nanota izy.
"Mamindrà fo amiko, Andriamanitra ô, araka ny fahasoavanao;
Araka ny haben' ny fiantranao vonoy ny fahadisoako.
...Sasao madio aho ho afa-keloka,
Ary diovy aho mba ho afa-pahotana.
...Amorony fo madio aho, Andriamanitra ô;
Ary havaozy hiorina marina ny fanahiko ato anatiko.
Aza manary ahy hiala eo anatrehanao;
Ary aza manaisotra ny Fanahinao Masina amiko.
Miarahaba anao tonga mitsidika eto amin’ny Anaran’i Jesosy !
Ity blaogy ity dia natokana handraisana an-tsoratra ny Toriteny sy fampianarana Soratra Masina avy amin'ny mpitoriteny samihafa tany am-piangonana na amin’ny fampielezam-peo.
« Izay soratra rehetra nomen’ ny tsindrimandrin’ Andriamanitra dia mahasoa koa ho fampianarana, ho fandresen-dahatra, ho fanitsiana izay diso, ho fitaizana amin’ ny fahamarinana, » 2Tim 3:16
Asa. 17:10 “Ary Paoly sy Silasy dia nampandehanin’ ny rahalahy niaraka tamin’ izay nony alina hankany Beria ; koa raha tonga tany izy, dia niditra tao amin’ ny synagogan’ ny Jiosy. Ary ny toe-panahin’ ireo dia tsara noho ny tao Tesalonika ; satria nandray ny teny tamin’ ny zotom-po indrindra ireo ka nandinika ny Soratra Masina isan-andro, na marina izany, na tsia. ”
Izany teny voasoratra izany no isintonantsika lesona ankehitriny
Tenin’Andriamanitra natao hanovozana fiainana fa tsy ho fahalalana ara-tsaina fotsiny araka ny Jaona 20 : 31 ” Fa voasoratra izao, mba hinoanareo fa Jesosy no Kristy, Zanak’ Andriamanitra, ary mba hanananareo fiainana amin’ ny anarany, raha mino hianareo”. Hananantsika fiainana ilay tenin’Andriamanitra, ilaina ny mandinika ny Tenin’Andriamanitra hanovozan-desona, hamantantra ny sitrapon’Andriamanitra.Ny mampiavaka ny kristiana amin’ny mpianatra tantara, ireo dia mianatra fotsiny ihany ahafantarany ny zava-marina fa tsy misy idirany amin’ny fiainany izany. Isika kristiana tsy tahaka ireo mpandinika ara-tsiansa ny hatsaran’ny sakafo, izay mandanjalanja fotsiny ihany ny calorie, vitamine protida sns ; ary eo no ilazany fa tsara na ratsy ny sakafo, ny mpihinana kosa mijery, manadrana amin’ny vava dia mandre na tsara na tsia ilay sakafo. Sal 34:8 “Andramo ka izahao fa tsara Jehovah”: ilay maka ny tsirony mihitsy no tadiavin’Andriamanitra amintsika.
Eo anatrehan’ny tenin’Andriamanitra dia misintona lesona no ataontsika fa tsy mamantatra fotsiny hoe tamin’ny datin’izao dia nisy an’izao sns, tsara raha toa ka mitondra lesona ho amin’ny fiainantsika ; ny fahalalana mampieboebo fa tsy mitondra vokatsoa, fireharehana mialoha fahasimbana Ohab 24:10
Misy karazana mpino 2 hita eto amin’ity teksta ity :
1. mpino avy any Beria
2. mpino avy any Tesalonika
Nampitahaina teto ny toe-panahin’izy ireo : nanantombo ny olona tao Beria dia ireo izay nanam-pinoana. Tsy mba ho satritsika ve mba ho ankasitrahana toy izany ny toe-panahintsika, noho ny an’ny hafa , raha tiantsika izany dia mila mianatra ny nataon’ireto olona tao Beria ireto isika. Mat 25:21 ” Hoy ny tompony taminy: Tsara izany, ry mpanompo tsara sady mahatoky ; nahatoky tamin’ny kely hianao, dia hotendreko ho mpanapaka ny be; midira amin’ny fifalian’ny Tomponao.” Ny fankasitrahan’ny Tompo dia sarobidy sady mamy !
Andeha hofantarintsika hoe inona no mahatonga ireto olona tany Beria ho miavaka kokoa noho ireo tany Tesalonika. Tsy hoe tsinotsinona akory ireo Tesalonika fa nanana ny maha-izy azy I Tes 4:1 : “Ary farany ry rahalahy, mangataka aminareo sy mananatra anareo ao amin’i Jesosy Tompo izahay, mba ho araka ny nandraisanareo taminay izay mety handehananareo sy hanaovanareo ny sitrapon’Andriamanitra - dia araka ny andehananareo ihany - no hitomboanareo bebe kokoa.”
Tsindriana ao anatin’izay ilay hoe efa manaraka izany rahateo ianareo, kanefa dia manatombo lavitra ny tao Beria, noho ny antony 3 :
Antony 1: Nandray ny teny izy ireo (And 1) Misy anie ka tsy mandray ny teny e ! tahaka ny mofomamy ao anaty vitrine ihany : nojerena fotsiny fa tsy noraisika. Raha tiantsika ny ankasitrahan’Andriamanitra dia mila mandray ny teny, raiso ny Tenin’Andriamanitra ho fanilon’ny tongotrao sy fanazavana ny lalanao Efes 6:17
Izany Tenin’Andriamanitra izany dia aina ho an’ny mahazo azy, fahasalamana ho an’ny nofony rehetra
Nandray ny teny tamin’ny zotom-po indrindra ireo : mazoto mihinana ny tenin’Andriamanitra, mianatra ny tenin’Andriamanitra, mazoto mihaino ny toriteny : izany no mahatonga azy ireo mazoto ara-toepahany araka an’Andriamanitra mahatonga azy ireo ho olona ankasitrahana. Misy olona tsy ny tenin’Andriamanitra no mampazoto azy fa zavatra hafa.
(Lire la suite de l’article)
| « | décembre 2023 | » | ||||
|---|---|---|---|---|---|---|
| lu | ma | me | je | ve | sa | di |
| 1 | 2 | 3 | ||||
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
- avril 2013 [2]
- avril 2009 [2]
- août 2007 [3]
